Oferta Vinculante Confidencial

Oferta Vinculante Confidencial

Galego

Formulario para solicitar o envío dunha Oferta Vinculante Confidencial. O prezo do servizo será de 10 €. Inclúe:

  • Envío de solicitude certificada administrativa con resguardo e selado de tempo.
  • Envío de resposta de volta (certificada e con selado de tempo) sen custo para a persoa ofertada.
  • Certificación administrativa.
  • Trazabilidade de todo o proceso.
  • ⁠Código de Verificación Electrónica: o CVE é un conxunto de caracteres que permiten identificar de forma única calquera documento.
  • En caso de chegar a un acordo, posibilidade de sinatura electrónica certificada de documentos en liña. Rexistro gratuíto do documento.

Máis información

OFERTA VINCULANTE CONFIDENCIAL

Este servizo está dirixido exclusivamente a profesionais da avogacía.

SOLICITUDE DO SERVIZO

A continuación indícase o procedemento para a solicitude de comunicación dunha Oferta Vinculante Confidencial:

  1. Premer no botón “Solicitar servizo”.
  2. Realizar o pagamento da taxa administrativa de 10 euros (21% IVE incluído) a través da pasarela habilitada na páxina web.
  3. Despois do pagamento, o usuario recibirá no seu enderezo electrónico unha mensaxe cunha ligazón para cubrir o formulario de solicitude. Esta ligazón é única para cada pagamento realizado.
  4. Premer no botón “Acceder” da mensaxe recibida e identificarse mediante certificado electrónico. O DNI asociado ao certificado deberá coincidir co indicado no formulario de pagamento.
  5. Cubrir o formulario de solicitude en liña, envialo e asinar electronicamente o documento xerado para completar o proceso.

A solicitude só quedará completada unha vez asinado o documento e recibida a confirmación correspondente. A partir dese momento, o Consello da Avogacía Galega recibiraa para a súa tramitación.

PRESENTACIÓN

Este Servizo de Oferta Vinculante Confidencial configúrase como unha ferramenta institucional desenvolvida polo Consello da Avogacía Galega e concibida para facilitar o envío e intercambio de documentos a través dun sistema certificado. Baséase no recoñecemento da autonomía da vontade das partes conforme ao principio dispositivo que inspira o noso ordenamento xurídico civil (artigos 1809 e seguintes do Código Civil), potenciando a seguridade xurídica das transaccións e a eficacia dos mecanismos de autocomposición de conflitos. Ademais, axústase ás previsións da L.O. 1/2025, de medidas de eficiencia na administración de xustiza, se ben corresponde aos tribunais a cualificación da súa idoneidade en cada caso. A plataforma proporciona un espazo virtual de comunicación seguro e certificado que permite ás partes enfrontadas nunha controversia xurídica formular, presentar e responder a ofertas vinculantes para a resolución do seu conflito, con plenas garantías de confidencialidade e valor xurídico.

CARACTERÍSTICAS E PRINCIPIOS DO SERVIZO

O Servizo de Oferta Vinculante Confidencial fundaméntase nos seguintes principios e características:

  • Seguridade técnica e xurídica: plataforma electrónica dotada de mecanismos avanzados de seguridade e certificación que garanten a autenticidade e integridade das comunicacións.
  • Confidencialidade reforzada: sistema que preserva o contido das ofertas ata que se producen as condicións preestablecidas para a súa revelación á parte contraria.
  • Carácter vinculante: as ofertas realizadas a través da plataforma posúen natureza vinculante para o oferente, de conformidade co disposto nos artigos 1254 e seguintes do Código Civil.
  • Flexibilidade: adaptación ás necesidades específicas de cada procedemento e á natureza do conflito xurídico subxacente.

FUNCIONAMENTO DO SISTEMA

O Servizo de Oferta Vinculante Confidencial articúlase mediante un procedemento estruturado e sinxelo:

  1. Rexistro e identificación: as partes ou os seus representantes legais acceden á plataforma mediante sistemas seguros de identificación electrónica.
  2. Configuración do procedemento: establecemento dos parámetros do procedemento (prazos, condicións de revelación, requisitos específicos).
  3. Formulación de ofertas: o oferente introduce a súa proposta de solución no sistema, especificando as condicións e termos da mesma.
  4. Certificación: o sistema certifica electronicamente a presentación da oferta, cun selo temporal que garante a súa inalterabilidade.
  5. Comunicación á contraparte: a plataforma notifica á parte contraria a existencia dunha oferta vinculante, que pode ser revelada baixo as condicións preestablecidas.
  6. Resposta: a parte receptora pode aceptar a oferta, rexeitala ou formular unha contraoferta a través do mesmo sistema.
  7. Finalización: o procedemento conclúe coa aceptación dunha oferta (acordo vinculante), ou coa constatación da imposibilidade de acordo.

VANTAXES DO SERVIZO

  • Comunicación certificada: garante a constancia xurídica da remisión e da posta a disposición do documento.
  • Seguridade técnica: sistema con protocolos avanzados de ciberseguridade e selado temporal.
  • Eficiencia: simplifica o intercambio documental e evita desprazamentos ou remisións postais.
  • Valor probatorio: a certificación emitida polo Consello pode incorporarse a expedientes xudiciais ou extraxudiciais.
  • Integración cos MASC: facilita a formalización de acordos alcanzados na negociación.

GARANTÍAS INSTITUCIONAIS

O servizo ofrece as seguintes garantías:

  • Intervención como terceiro de confianza.
  • Selado temporal cualificado conforme ao Regulamento eIDAS.
  • Confidencialidade e protección de datos reforzada.
  • Cumprimento estrito das normas de deontoloxía profesional.

INFORMACIÓN DE CONTACTO

Para máis información sobre o Servizo de Oferta Vinculante Confidencial pode contactar co Consello da Avogacía Galega: Rúa Federico Tapia, 11, 1ºA, 15005 A Coruña – 981 12 08 84 – https://avogacia.gal/